Reticencia Galega

14.12.06

Primeira MANIFA de Reticencia Galega


RG acaba de celebrar, cun espectacular éxito de público, a primeira manifestación da súa curta historia. O acto, ao que acudiron perto de 8 millóns de persoas, foi considerado polas restantes formacións políticas coma unha exhibición de forza e un desafío ao actual sistema de partidos.

Así, Núñez Feijoo referiuse a el como: "eran cuatro pelagatos". Mentres tanto, o bipartito fixo unha declaración conxunta na que salientaba "o carácter cívico, e en todo momento dubitativo" da manifestación, nun claro guiño a RG de cara a futuras alianzas.

A imaxe fala por si soa.

El Progreso del Hugo

7.12.06

MINIMANIFESTO


A Asociación de Xente Normal (AXN), por medio da súa filial Asociación de Amigos da Xente Normal (AAXN), anuncia o nacimento dun novo partido regionalista gallego radical, dubitativo, sen adscripción ideolóxica (nunca se sabe a quen lle haberá que pedir un favor) e cunha fonda vocación extraparlamentar.

Os Reticentes queremos manifestar con total contundencia a nosa absoluta falta de posición ante os grandes problemas da actualidade. En termos de programa, e a respecto da escena partidaria da nosa Comunidade, non hai nada importante que nos distinga nin temos nada relevante que aportar. Se acaso, expresamos a nosa extrañeza pola rotundidade coa que se empregan no día a día os partidos políticos en Galicia, comportamento que a parte de chulesco e medio raro, é completamente alleo á nosa realidade social e deturpador das nosas esencias incertas (pouco normal).

Os eslógans de RG, a día de hoxe, son os seguintes:

"Reticencia Galega: A forza débil"
"Reticencia Galega: O partido da xente normal"
"Reticencia Galega: Ao final, nunca se sabe"
"Reticencia Galega: Igual si; non decimos que non"
"Reticencia Galega: Reticentes por Galiza"

Venceremos! (igual non convencemos, nin falta que fai)